كلمـــات منقـــوله ..

عزفت على اوتــار قلبـي الحساســه .. لامست ذلك الوتـر تحديــدا ..

قــرأتهــا .. واحسست انني اعيش سطورهــا .. كأني من نمق كلماتها لتكون معزوفة الحزن بداخلي..

(دمــوع) ..
*
*
دموع تناثـرت على خـدي ... اغرقــت عيناي حين سمعت تمتـمتهــا .. تلك التي عاشــت الشـوق له .. وهو الـذي يعيش الشـوق لها ..

ومـــااروع ذالك الاحساس الطاهر .. فعلا ابكى مدمعي .. ومانتهيت من قرأتها الا ان دعيت له(اخوي) .. وربي يحفظه ويحفظنا جميعا ويرد الجميع سالما ..

فـ ايا كان البلد .. ومن فقد من بيننا .. انا من غبت ...او هو فقد....فالجميع يعيش الغربه ..

فانا في بلد ..


*
*



اترككم معــها ..لتعيشوا احساسها ..
*
*
*






كلمات مبعثره ..

وأفكار مشتته ..
لا ادري ماذا اسميها ..
هل هي مجرد خاطره ..

ام انها مشاعر قلب فقد أعز مايملك ..

مهما كانت ..

فهاانا اضعها هنا ..

تماما ...

كما خرجت ..


*
*
*
*




السنه الاخيره لي بالجامعه ...

اليوم كان مررررره تعب ...

وما كان فيه أي مجال
للمزح او اللعب ..

محاضرات طويله ...

واستاذة كانت كئيبه وممله ...

ما عمري شفتها بيوم تبتسم ...

ولا تقول لنا على الأقل
مواعظ أوحكم ...

ما افهم شئ من كلامها ...

كله فلسفه ... و بربره ..

وفي النهايه تسميها محاضره !!

.
.
.


يالله ... ياليت لو امسك ياهالجامعه عمادتك ...

كان فعلا خليتك توازين بمكانتك

"هارفارد "

ولا " اكسفورد "

وخليت مبانيك خياليه

وحولها فل وورد ..

.
.

اخلي العالم كلهم يحكون عنك ...

ومن العجب ينبهرون منك ..

والدنيا كلها تنظم رحلاتها لك ..

يقولون لطلابهم ...
شوفوا هذي ارقى جامعات العصر
واقوى شهادات مو مثل شهادات مصر..

واخليهم يتمنون يجونا بعثات لعندنا ..
واقولهم وقتها ...
آسفين مكان لهالشرذمه ماعندنا .

جامعتنا عريقه ...
وما تستقبل طلاب بمثل هالعقليه ...

طلابنا شئ..
وانتم ما تساوونهم بشئ...



مسكينه والله ياهالجامعه ...

ما لك من يدافع عنك ...
ومالك من يرفع اسمك ..
الكل منشغل يرفع اسمه ..
والكل بدا اول شئ يكتب "د" قبل اسمه ..

مدري من وين يجيبه ...
يمكن من أحد البلدان يستعيره ...
وهذا شئ عادي موغريبه ...
.
.
.

رجعت بدري من الجامعه ...

كان ورانا اختبار طويــــــــــــــل

وشايله همه حيــــــــــــــل


انا كذا من دخلت الجامعه ...

ولا ليله مرت علي ...

الا واقضيها بين كتاب ومذكره

يالله ... ياطول هالسنه ... وما أملها ...

احس ليالها بسنه ...

وثوانيها صارت سنين ...


دخلت البيت ...

كيف حالك يالغاليه ...

كانت امي تنتظرني ... هلا فيك يمه ...

حبيت راسها وكفها ...

وضميتها ..

هذي عادتي من أنا صغيره ...


ادخل غرفتي ...

يمه .. بأنــــــــــــــــــــــــام ولا يصحيني أحد ...

ودي اذاكر وراي اختبار بكرة الاحد ..


رميت نفسي على السرير ...


وتوني بأنام ... وأعيش الأحلام ...

الا اسمع صوت يناديني ...

: يمه ... يمه ...يافلانه ..

اقوم من سريري : آمريني يمه

يمه شوفي رقم بالتلفون .... لمين ...
لا يكون لواحد من أخوانك المسافرين ...

جيت للتلفون ...

ايه والله هذا رقم اخوي المزيون

سته واحد ...

فتح البلد ...

يمه هالرقم لأخوي ...

اللي سافر وابتعد ...

تبين ادق عليه ...

لا يمه ... اخاف نشغله ... خليه شوي ..

الليله ... بنكلمه ...

روحي نامي الحين ... والمساء ... يصير خير...

شوي ... وأسمع جوالي بالغرفه يرن ..

اركض عنده ... عرفت من هو يرنه ...

رقم خاص ...

يتصل بك ...

يمه ... يمه ...

هذا اخوي يمه ... ألحقي...

تعالي يمه .. اعجلي ...

.
.

مدري ليش اتهرب انا منه ...

ويوم يتصل ...
احاول ابتعد عنه ..

يمكن اخاف لا انفضح .. انا وابكي ...

و يوم اسمع بنبرة صوته ...اقعد أشكي ..

.
.

من يوم سافر... من يوم رحل وهاجر...

وانا قلبي معه ... ابكيه بكل ليله ...

وتدمع عيوني لا ذكر بس طيفه ...

.
.


يقاطع تفكيري صوت امي ...

: يالله ..الله يحفظك ... انتبه لنفسك ... اذا احتجت شئ ..كلمنا يمه ..

تلتفت علي ... تمد لي التلفون ...

خذي يبيك ... بيكلمك ...

يقول وش اخبارها ...

من زمان ما سمعت صوتها ..

يالله ... هذا اللي خفت منه ... ما ابي اكلمه ...

اخاف لا من سمعت صوته ...

تخنقني العبره ...

بس هالمره ...

هو طلب وأمر ...
يعني مالي عذر..


اخذت التلفون ...

: ألووووه..

: هلا والله بهالصوت ... وينك .. يعني ما وحشتك ...

يووووه ياخوي... وكأنك متعني تبكيني بكلامك ...

:هلا بك يالغالي...
أبد بس شوي منشغله ...
ولا ني فاضيه حتى لحالي ..

المهم طمنا عليك ...

: انا الحمد لله بخير ...

وكل شئ أبيه ...
في دقيقه يصير ...

يعني لا تخافين على اخوك ... ذيب ...

والكل عندي ما يناديني الا يالحبيب ...

.
.
.

بدا يحكي عن حكاياته ... وبدا يسرد مغامراته ..

انا كنت معه ... وماني معه ...

كل كلمه .. اسمعها منه ...
اتذكر بها ذكرايات بيني وبينه ...

.
.


: الووووه ... يابنت وينك .. انتي معي ..

ايه يالغالي... معك..

بس اخاف اطول عليك ...

تدري ... اليوم بأنتظرك ...

على الماسنجر..

احسن لي ولك

: اوكي ... انتظرك اليله ...

قفلت عنه ...

وما كنت بأنسى ولا كلمه منه ..

بعدها ..

حاولت انام ...

بس كيف يكون المنام .. ولا كيف يتكون الاحلام !!
.
.
.

الساعة تسع المساء...

مدري الحين الاقيه صاحي ولا نام ونسى ...

بأدخل ... وانتظره ...

واذا صحى ..

اكيد بيدخل
.. بيكون عنده الفجر ولا الضحى ...

انتظرته ... ساعه ... وساعتين ...

في النهايه ...
مالي الا بالجوال
ارسله كلمتين ...

انا انتظرك ...

اذا صحيت ...

دقائق ... الا

تسجيل دخول

"ايا طيراً تجلى مع الضحى ... ارسل سلامي لقلب آسرني بالهوى"

هلا والله بالعاشق الولهان ....
يابخت من له هالسلام

: ومن مآخذ عقلي .. وقلبي غيركم ...

: علينا هالكلام ... ياقمر ..

اعترف من مآخذ قلبك من البشر...

: وأنا كم لي قلب يآخذونه

هو قلب واحد بقى معاكم ...
وغارق بشجونه ...

.
.
.

لحظه ...


انتظري اشغل الكاميرا ...
عشان تشوفون اخوكم المزيون
وش حاله بأرض الأوبرا ..


تطلع صورته ...
ماتغير .. مثل ماهو على حاله


بس أثر فيه السفر ...
وجهه كان شوي مغبر ..
وجسمه هزل ...
وبان في عيونه السهر ...
لكن ... مدري هو من السفر ...
ولا من بعده عنا ما احتمل ...

: غريبه ..

وش مصحيك الحين
قبل الفجر ..
لا يكون ازعجت منامك ..
وحولته سهر ..

: لا ابد ..

بس حلمت فيكم بحلم .. وصحاني
قمت من منامي ..
وسبحان الله ..
لقيت هالرساله بجوالي ..



.
.
.


اقول لك ... ياخوي ...
جاوبني سؤال ..
دار في عقلي وحار ...

.
.
.


أمــــــــــانه ... وش اخبــــــارك مع الغربـــــه ...؟؟

.
.


تقطع صوته ... بحينها ..
حسيته ... ما وده يكمل اجابته ...

.
.
.


: بأجاوبك ...
بس بالاول ... قولي لي امي مو عندك ...
لا يكون هي بجنبك ؟؟

: لا لا تخاف ..

امي انتظرتك ... معاي لين ما هم الليل بالأنتصاف ...

طولت علينا ... وراحت تنام ..

خذ راحتك .. ولا تخاف ما بتنلام ..


.
.
.

عرفته ...

حنون بطبعه ...

خاف لايشكي ...
تسمعه أمي وتبكي ...

يكره يشوف دموعها ...
وموته
لا سمع انين بصوتها ...

.
.
.

: الحين ما لك عذر ...
قول ترى انا انتظر ...

.
.
.

اخذ نفس عميق ..
وتنهد ..
وبصوت مبحوح ..
بان فيه انه
مجبور على البوح ..


بدا يسرد كلام ...
ويحكي بكل انسجام ..

.
.

تدرين يافلانه ...

والله ما احس اني عايش وانا بعيد عنكم ...

كل شئ ماله طعم ...
وكل شئ احس وراه هم وغم ...

ما اضحك الا قليل ...
وليلي صاير طويل ...

اتذكر ايام ..
واتذكر ايام ...
وبعد ما اخلص من الذكرى ...
ارجع سريري ...
وما اقدر انام ...

.
.

تدرين يافلانه ..

اتذكر وانا صغير ...
كنت بيومها ...
اقول:
يارب متى اصير كبير ..

اتمنى لو بيوم اسافر ...
ولأرض الغرب اغامر ..
ادرس عندهم ...
وبعدها أصير عالم ...

عشت احلام واحلام ...
ورسمت لي طريق
بأرض الاوهام ...

كل شئ فكرت فيه ...
وكل شئ لقيت له حل ...
الا الغربه ...
نسيتها من بالي ...
وما فكرت لها بحل ...


واليوم انا اعاني...

و للغربه ... صرت انا أسير...

.
.
.

آ آ آ آ ه يافلانه ..

ياليت ترجع الايام ..
كنت عدت رسمي لذيك الاحلام ...

كان حطيت ببالي ...
اول شئ ...
اني ما اسافر عن هلي ...

الله عليك يالغربه ..
وش بقيتي لي من حالي...

صرت اسولف ...
وأسولف ...
مع نفسي لحالي ..
الكل صار يقول مجنون ...
أواكيد فقد انسان غالي ..
مادروا اني فقدت عمري معاكم
واني أسير لغربتي لحالي ...

.
.
.

آ آ آ آ ه يافلانه ..


تذكرت ايام الدراسه ... كنت اندس تحت الوساده ..

تجي امي تناديني ... وتحاول من السرير تقومني ..

فلان ... يالله يمه ...

الناس راحوا لأعمالهم ... وانت لسى بالسرير يايمه ..

اسوي نفسي نايم ... ولسى بأحلامي هايم ...

تجي تقرصني بأذني ..

افز بعدها فزة ...

تقومني عن السرير بالمره ...


تضحك امي على كثير ....

انت ماينفع لك تصير...

الا مسؤول او وزير ..

يومها من جد بتكون للنوم أسير ...

.
.

يوم ارجع ...

الاقي اخواني ... متجمعين
للغداء على السفره ...
فلان ... بسرعه
احنا نستناك من فتره ...

تعودنا احنا على كذا ...

ما ناكل الا مجتمعين كنا ...

وما ناكل لو احد ناقص منا ...

لكن .. انا وش اسوي الحين ...

من وين لي بمن يسليني
وعلى اكلي يهنيني ..

الله عليك يالغربه ..

من أجي آكل اتذكركم ...
تغص اللقمه بحلقي ..
وأناديكم ..

.
.
.


كنت اسمعه .. وأبكي .. دموعي كانت تغرقني ..

ما كنت اقدر أكمل ...
ولا كنت اقدر اقاطعه ..
أو اتكلم ...

.
.
.


آآآآآآآآآآه ه يافلانه ...

هالسنه مر علي رمضان ..

ما سمعت فيه صوت الاذان ..

مر علي بسرعه ...

وما حسيت بفرحتي يمه ..

اتذكر كنا ننتظر ...
متى يجي هالشهر ..

وليلته ...

ننزل نزرع الشارع ..

طراطيع وبدايع ..

كنا نحس اننا بشهر فضيل ...

نفرح بجيته وننتظرها طول السنين ..

لكن الحين ..
صار عندنا رمضان
شهر للأحزان ..

بعد ماكنا نفرح به ..
صرنا اليوم
نحزن به ..

لان أحلى ذكراياتنا معكم
كانت به ..

واحلى ايامنا
عشناها به ..
وشلون ننسى ايامه


الحين ... اقابل زملاي بالمسجد ..
ونتعازم على السحور والتهجد..

نحاول نعوض بعض ...
ونسلي بعض ..

بس محاولاتنا تفشل ..وتتكسر ..
وبالآخر ..
نرجع لهمومنا نتحسر ..

.
.
.

بيوم
اجتمعنا للفطور...
كل واحد كان يمثل على الثاني
انه مسرور ..
وعايش بحبور ..

بس العكس تماما كنا ..

بدأينا فطور...

والصمت كان يعم المكان والحضور...

كل واحد كان يآكل لقمه ..
ويتذكر أهله بجنبه ..

فجأه ..

الا... واحد ..

رمى لقمته من يده ..

شهق بقوه

صرخ ..

ومثل طفل بدأيبكي ...

اجتمعنا حوله ..

وكل واحد من عندة يلمه ...

كان أول شهر له بالغربه ...
ومسكين
لسى ما ذاق الألم الحسرة ....

.
.
.


أأأأأأأه يافلانه ..

يوم العيد ...

ماجاني النوم ... مثل العاده ...

كنت انتظر لين نصلي الفجر..

ونجتمع على القهوة ..

ثلاث تمرات .. ونختمها بحلاوه ..

ونروح نصلي العيد ... مع الجماعه ..

نحس بطعم العيد ..

نرجع البيت ...

وتبدأالعيديات اللي صارت عندنا عادة ..


لكن اليوم ..

صليت العيد ...
وابتسمت لمن حولي ...
كنت امثل عليهم اني سعيد ..
وانا ابعد ماكنت عن قولي ...

.
.
.

فلانه ..

تكفين ..

صوري لي غرفتي ..

وسريري ومكتبي ..

ارسليها لي بالبريد ..

نفسي اشوفها ,, واتذكر ايامي بها..

احسها لها مكان .. ونبضها معي بالوريد ..

.
.
.

وش تبيني احكي... ولا وش تبيني اشكي..

همي صار كبير ... وحالي صار كئيب ..


فجأة ..

فلانه ... وش فيك ساكته
أكيد الحين دموعك على الخدين ...
وصوتك يتقطع من الانين ...

اشوف تكلمي بأسمع صوتك ...

ويــــــــــاويــيـــــــــــلـــك

لو لقيت دموع بعينك ..

.
.

امسع دموعي بسرعه ...

وارشف شوية مويه ...
عشان صوتي لايفضح حنينه

.

.

هلا ..
لا انا معك ...
وبعدين وش هالثقة ..

على بالك بأبكي عليك ...
ولا مهتمه بك ...


يضحك ..

اشوى
..لا.. بس ...
متعود على بعض الناس ...

شديدين الرقه والاحساس ...

اقول ...

بأسألك سؤال ...

وتجاوبيني بدون أي اعذار ...

من يوم سافرت ..
كم مره بكيتيني ..
وبعيونك دمعتيني ..

اعرفك ... دموعك دايم فضّاحه ..

ومن يوم احد يسافر تقلبين البيت عزا ومناحه ..

: طيب انا اوريك يا "دبا "...
هذا جزاي يوم اني اخاف عليك
وادعي لك ربي واترجا ..

اصلا مابكيت عليك ..

أبد ..

الا مره .... وانت مسافر بالمطار ...

يوم سافرت وابتعدت عن الانظار ..

ومره يوم العيد ...

يومها فقدنا صوتك يالعنيد ..

ومره يوم حفلة نجاحي ..

تمنيتك معي ...

بس ترى مو عشان اشوفك ..

بس فقدت هديتك .. وبسمة عيونك ..


ومره ...

ومره ..

ومره ..

سكت شوي ..

كنت بأقوله ...
وفي كل ليله ...
كل ماجيت أنام ...
اتذكر طيفك ...
وأعجز انام ..
واذا نمت ..
كنت تجيني بالاحلام ..
افز ... من نومي ..
اناديك ...
ابي اسمع صوتك بجنبي ...
لكن..
ما الاقيك ...

.
.
.


غصيت بعبرتي ..
وانخنقت من انفاسي ..
وجهي انغسل بالدموع ..
وماعد صرت اتحمل مرارة اللوع ..

.
.

قطعت انا المايكروفون ...
والسماعه ..
وارسلت له رساله ...
ماعليش انقطع سلك السماعه ..
وخلينا نكمل السوالف كتابه ..

.
.

اول مره بحياتي اكذب عليه ..
بس مو بيدي
هذا من خوفي عليه ..
لو سمع صوتي يتقطع ..
وحس اني اتوجع

بأزيد همه ...
وبترجع له اوهامه وغمه ..


حسيت وده يفضفض ...
همومه زادت عليه ..
ووده احد له همومه ينفض ..

ماله احد غيري ...
وما بيفهمه احد مثلي ..

لو حس اني تضايقت ...
او من همومه توجعت ..

بيحرم بيوم يحكي لي ...

وبيفضل ...
يكتم لآلامه ..
على انه يبكيني ..


بالنهايه ..

حسيت ودي اغير الموضوع ..
الالم قطع قلبي وقلبه ..
وما صار فيني احتمل اسمع ...
ولا بيدي اشيل عنه الوجع ..

.
.
.

فلان ..

كيفك بالدراسه ... يقولون معك بنات ..

الا قول لي ..

هم مزيونات ؟؟

ضحك ...

وانورت الدنيا بوجهي بضحكته ..

تدرين... البنات .. من حولي ...كثير ..

اخوك ... طبعا مشكلته انه مزيون ..
ويسحر كل القلوب والعيون ...
ويجذب الكل من كل شكل ولون ..

بس ابد لا تخافين ..

ماقلت لك أخوك ذيب ...
وما عمره بيكون
لهالمماسيخ حبيب


: كفو والله ... ياهالذيب ..

والله خوفي .. تجينا بكره .. بأربع ..
وتقول بس احسن النسل ...
والشرع حلل لي أربع
وبعدين ولد رجال ..
ويحق لي على العرش اتربع ..

خبري بك ..
مجنون ..
ومثلك ..مافيه بهالكون ..
تحب تصير بهالدنيا متميز ..
ودايما ..مثل عادتك ..
للرجال متحيز ..


المهم .. بس ...
زواجك خله عندنا
هنا ...
ترى انا لسى
عند وعدي ..
ما فيه احد بيزفك غيري ...
ومايلبسك بشتك غيري ..

وأبخرك بعد ...
ولك مني وعد ..
ما أجلس ولا دقيقه بعرسك ابد..

يضحك علي ..
انتي ليش ديما ناويه علي ...
الا لازم اعرس ...
عارف مو لي
بس تبين تكشخين ...
وتصيرين أخت المعرس ...

.
.
.

تصدق ودي اقولك شئ مسبب لي تأنيب ضمير..

ودام انك بعيد فما يمنع اقولك
عشان تكون بالصوره وتعرف المصير ...


.
.
.

كان ينتظرني على عجل ..

متوقع اقول له كلام ما يتحمل المناقشه ولا حتى جدل ..


.
.


وبأنصات ..

.
.

تتذكر قلمك .. الفضي ...
اللي جاك هديه من مبطي ..

تتذكر كيف كنت تدرورله ..
وحطيت جائزه ..
للي يلاقيه ويعثر له ..
ترى
بصراحه
بصراحه
انا اخذته ..
كنت بس بروح فيه
اكشخ به ..

ضاع علي ..

وتورطت ..

وماعرفت كيف اشرح لك ..

.
.
.

حسيته كان وده ..

يجيني بالحال ..

ويقضي علي ..
سببت له اكتئاب ..
وتكدر بالفال ..

.
.

طيب يافلانه ..

الحين بدأ تأنيب الضمير ..
وش بعد ..
قولي لي ..
اشوف الحين بدأ الاعتراف .. والتبرير ..

اقول لا يكون ساعتي الجلد المذهب ..

كان لها نفس المصير من السرق والنهب ..


: أي وحده فيهم ..

اية .. قصدك البنيه ..
لا حسافه ..
شكلها كان مايناسبني ..
خساره بس ياليتني ولد مو بنيه ..

.
.
.

انقلبت مناحتنا ... لضحك .. يقطع ليلتنا ..

.
.

سألني بالنهايه ..
عن اخباري..
عن دراستي ..
وحالي ..
بعد ماراح اللي كان يونس لي الليالي...

كان يسهر معي..
على كتابي..
ينكت عليه ..
وشوي بس يشرح لي..

يقلب كل القوانين على كيفه ..
وعنده نظريات غريبه عجيبه !!


ونيوتن بعلمه ..
يصير عنده ..
جاهل..
مايعرف الحق
من الباطل ..


بس احب جلسته ..
وتعجبني ضحكته ..

اسلوبه في الشرح خطير ..
واللي يسمعه ..
يقول عالم في الذره
والفضاء..
وفي علم المال ..
وكيف تصبح وزير..

والمشكله
انه في كل شئ خبير


فقدته حيل ...بغيابه ..
وفقدته حيل بسفرته ..
وتمنيت رجعته ..


ودعيت له ربي ..

يارب.. توفقه ..

وتسهل له أمره ..

ولنا يارب بالسلامه ترجعه ..